უწყებებს შორის უკეთესი კოორდინაციის უზრუნველსაყოფად და სააგენტოს საქმიანობის განვითარების მიზნით, ქვემო ქართლის რეგიონული ცენტრის ხელმძღვანელის ბ-ნი დავით ჭყონიას  ინიციატივით  შედგა შეხვედრები მომსახურების ცენტრის ხელმძღვანელსა და თვითმმართველობის ორგანოების ხელმძღვანელ პირებს შორის.

თვითმართველობის მხრიდან შეხვედრას ესწრებოდნენ რუსთავის საკრებულოს თავმჯდომარე კახა გურგენიძე, გარდაბნის მუნიციპალიტეტის საკრებულოს თავმჯდომარე ზაზა ონიანი, წალკის  მუნიციპალიტეტის საკრებულოს თავმჯდომარე დავით მაჩიტიძე და თეთრიწყაროს  მუნიციპალიტეტის საკრებულოს თავმჯდომარე გიორგი მესტვირიშვილი.  შეხვედრაზე გამოიკვეთა და განხილულ იქნა უწყებებს შორის არსებული პრობლემური და შეჩერებული საკითხები  და დაისახა  მათი გადაჭრის გზები. შეხვედრის შედეგად უწყებებს შორის აქტიურად აღდგა თანამშრომლობა და მიმოწერა. მიღებული შედეგი დადებითად აისახა  რეგიონული ცენტრის ფუნქციონირებაზე და მომსახურების ხარისხზე. 

სსიპ ,,სახელმწიფო ქონების ეროვნული სააგენტოს”   მიერ მიმდინარე წლის 10  დეკემბერს განხორციელდა შპს ,,ვარციხის“ სახელმწიფო საკუთრებაში არსებული  100%-იანი წილის ელექტრონული აუქციონის ფორმით პრივატიზება.

საწყისი საპრივატიზებო საფასური  შეადგენდა 1 340 000 ლარს, ხოლო ბიჯი 10 000 ლარს. ელექტრონულ აუქციონში ორი კონკურენტი კომპანია მონაწილეობდა. ვაჭრობის პროცესში  გამარჯვებულმა   ,,შპს დუგლაძეების ღვინოების კომპანიამ“ ყველაზე მაღალი ფასი დააფიქსირა და იგი დასრულდა 67  ბიჯით. საბოლოოდ, საპრივატიზებო თანხამ შეადგინა  2 010 000   ლარი.  
ასევე, გამარჯვებულმა კომპანიამ  იკისრა შემდეგი ვალდებულებები:

ა) საწარმოსათვის არსებული პროფილის სრულად  შენარჩუნება შესაბამისი ნასყიდობის ხელშეკრულების გაფორმებიდან არანაკლებ 25 (ოცდახუთი) წლის ვადით.
ბ)  მყიდველის მიერ შპს ,,ვარციხეში“   არანაკლებ 1 000 000 (ერთი მილიონი) ლარის ინვესტიციის განხორციელება   შესაბამისი ნასყიდობის ხელშეკრულების გაფორმებიდან  24  (ოცდაოთხი)  თვეში.

2013 წლის 21 და 22 ნოემბერს, ქალაქ ქუთაისში „დემოკრატიული ჩართულობის  ცენტრში“ ჩატარდა ტრენინგი სახელმწიფო საწარმოთა თანამშრომლებისთვის. ტრენინგი ინიცირებული იყო სსიპ სახელმწიფო ქონების ეროვნული სააგენტოს ანალიტიკური დეპარტამენტის მიერ და მიზნად ისახავდა ახალი  ფინანსური ანგარიშგების ფორმის  წარდგენასა და დანერგვას საწარმოებში. 
ტრენინგს უძღვებოდნენ მისი ინიციატორები - ანალიტიკური დეპარტამენტის ხელმძღვანელი ლევან მენაბდე და ანალიტიკური დეპარტამენტის ორი თანამშრომელი - მანანა გრიგალაშვილი და გიორგი კაპანაძე. ტრენინგს ესწრებოდა დასავლეთ საქართველოს 17 საწარმოს წარმომადგენელი. მთავარ თემას წარმოადგენდა მონაცემთა შეგროვების ახალი ფორმის გაცნობა: ტრენინგის პირველი დღე მიზნად ისახავდა ახალი ფორმის და ორი ფინანსური უწყისის, მოგება-ზარალის და საბალანსო უწყისების განხილვას. მეორე დღე კი დაეთმო ფულის მოძრაობის უწყისის შევსების ორი მეთოდის გაცნობას. ტრენინგზე განხილულ იქნა შესაბამისი მაგალითები და იგი კითხვა-პასუხის ფორმატით დასრულდა. 
ტრენინგის საჭიროება გამოწვეულ იქნა საწარმოების შესახებ ფინანსური მაჩვენებლების სიმწირით.   საწარმოთა შესახებ არასრულყოფილი ინფორმაცია კი პრობლემას წარმოადგენს თავად ანალიტიკური დეპარტამენტისთვის და არ აძლევს მას მარტივი ანალიზის საშუალებასაც კი. 
უახლოეს მომავალში ახალი ფორმის დანერგვის საფუძველზე მოხდება  საწარმოების შესახებ სრულყოფილი ფინანსური ინფორმაციის თავმოყრა. ფორმები ფინანსურის გარდა მოიცავს ვერბალურ ინფორმაციასაც, რაც შევსებული მონაცემების განმარტებებს წარმოადგენს.  აღნიშნულ ფორმაში დეტალურად არის დასმული კითხვები, რათა მართებულად და სრულყოფილად მოხდეს საწარმოს შესახებ ინფორმაციის მოძიება და შემდგომ გამარტივდეს მისი ფინანსური ანალიზი.   
იგივე შინაარსის ტრენინგი ჩატარდა ოქტომბერში  თბილისის საწარმოებისთვის პროექტის  USAID-EPI მხარდაჭერით. ტრენინგის ძირითად საკითხებს წარმოადგენდა სახელმწიფო საწარმოების ფინანსური, იურიდიული და საოპერაციო ინფორმაციის მართვა. ტრენინგებს დაესწრო თბილისის 28 საწარმოს წარმომადგენელი.
მომავალში იგივე სახის ტრენინგი იგეგმება აღმოსავლეთ საქართველოში განთავსებული საწარმოებისთვის.
 

2013 წლის 26 ნოემბერს ჩატარდა სსიპ ,,სახელმწიფო ქონების ეროვნული სააგენტოს“ მიერ  ინიცირებული ელექტრონული აუქციონი, რის შედეგადაც მოხდა ქალაქ თბილისში, ბაღდადის  ქუჩაზე  მდებარე  13000.00  კვ.მ. არასასოფლო-სამეურნეო დანიშნულების  მიწის  ნაკვეთის პრივატიზება. 

აუქციონი გამოცხადებული იყო განსაზღვრული საინვესტიციო პირობებით. აუქციონში გამარჯვებულია საინვესტიციო კომპანია შპს „ქროს 2“, რომელიც არაერთ საინვესტიციო პროექტს ახორციელებს საქართველოში. 

გამარჯვებული კომპანიის მიერ აღნიშნული უძრავი  ქონების შეძენის მიზნით,  შემოთავაზებულია საპრივატიზებო საფასური   2 820 000 ლარის ოდენობით. აღნიშნულ ობიექტზე შპს „ქროს 2“ გეგმავს მსხვილი სავაჭრო ობიექტის მშენებლობას და არანაკლებ 1 000000 (ერთი მილიონი) ლარის ინვესტიციას. კომპანიამ  აიღო  პრივატიზებულ ობიექტზე მშენებლობის, მისი დასრულების და ფუნქციონირებისათვის  მომზადების  ვალდებულება შესაბამისი ნასყიდობის ხელშეკრულების გაფორმებიდან  30   თვეში. ხელშეკრულების პირობების შესრულების მონიტორინგს განახორციელებს სახელმწიფო ქონების ეროვნული სააგენტოს სახელშეკრულებო ვალდებულებათა  მონიტორინგის სამმართველო.

2013 წლის 24 ოქტომბერს ქუთაისში  სახელმწიფო ქონების ეროვნული სააგენტოს მომსახურების ცენტრს სააგენტოს ხელმძღვანელი პირები ეწვივნენ.

შეხვედრა ჩატარდა 2014-2015 წლების სტრატეგიული გეგმის შემუშავების ფარგლებში, რომელსაც სამხარეო ცენტრის თანამშრომლები, სტრატეგიული განვითარების დეპარტამენტის წარმომადგენლები და ხელმძღვანელობა ესწრებოდნენ. შეხვედრა მოიცავდა SWOT ანალიზის პრეზენტაციასა და დისკუსიას. საუბარი შეეხო ცენტრის სუსტ და ძლიერ მხარეებს, ასევე - დაბრკოლებებსა და ცენტრის განვითარების პერსპექტივებს. დისკუსიისას განხილული იქნა ისეთი საკითხები, როგორიც არის დელეგირება, თვითმმართველ ერთეულებთან ურთიერთობა, კოორდინაცია სხვა სახელმწიფო უწყებებთან, გადაფარვა, მიმდინარე სამუშაო პროცესები და სხვა თემები.

ვიზიტისას, ცენტრის სამუშაო პროცესს პირადად გაეცნო სააგენტოს თავმჯდომარე დიმიტრი ქუმსიშვილი. პარალელურად ქუთაისის მომსახურების ცენტრში ჩატარდა შესარჩევი კონკურსი იმერეთ-რაჭა-ლეჩხუმ-ქვემო სვანეთის მომსახურების ცენტრის უფროსის და კონსულტანტის ვაკანტურ თანამდებობებზე.  კონკურსის მსვლელობისას  38 კანდიდატთან მოხდა გასაუბრება.