საქართველოს ეკონომიკისა და მდგრადი განვითარების სამინისტროს სახელმწიფო ქონების ეროვნულმა სააგენტომ მიმდინარე წლის მესამე კვარტლის საპრივატიზებო გეგმა გადაჭარბებით შეასრულა. აქტიური პრივატიზაციის შედეგად, სააგენტომ სახელმწიფო ბიუჯეტში, გეგმით გათვალისწინებული 40 მილიონი ლარის ნაცვლად, 70 126 367 ლარი გადარიცხა (გეგმის 175.3%). საანგარიშგებო პერიოდში, სააგენტომ 198 ელექტრონული აუქციონი გამოაცხადა და 120 ერთეული უძრავი ქონება გაყიდა.
სახელმწიფო ქონების დაჩქარებული პრივატიზაციის ფარგლებში, სააგენტო კერძო სექტორს საინვესტიციოდ მიმზიდველ ობიექტებს რეგულარულად სთავაზობს. პრივატიზების პროცესი სრულად გამჭვირვალე და ხელმისაწვდომია. ნებისმიერ დაინტერესებულ პირს აქვს შესაძლებლობა, მარტივად მიიღოს მონაწილეობა მიმდინარე ელექტრონულ აუქციონებში და გახდეს სახელმწიფო აქტივის მესაკუთრე.
მიმდინარე აუქციონებში მონაწილეობის მისაღებად ეწვიეთ ბმულს: https://eauction.ge/

სახელმწიფო ქონების ეროვნული სააგენტოს თავმჯდომარე ირაკლი შენგელია სტაჟირების პროგრამის ფარგლებში შერჩეულ 22 ახალგაზრდას შეხვდა. შეხვედრაზე საუბარი შეეხო სააგენტოს საქმიანობას, სტაჟირების პროგრამასა და პროფესიული განვითარების შესაძლებლობებს.

სტაჟირების პროგრამა სააგენტოს საქმიანობის სხვადასხვა მიმართულებას მოიცავს, მათ შორის, სახელმწიფო ქონების პრივატიზებას, მომსახურების მხარდაჭერას, სახელმწიფო საწარმოებთან ურთიერთობას, ადამიანური რესურსების მართვას, იურიდიულ და ადმინისტრაციულ საქმიანობასა და სტრატეგიული განვითარების მიმართულებას.

ეკონომიკის სამინისტროს სახელმწიფო ქონების ეროვნულმა სააგენტომ, 2025 წელს პრივატიზაციის გეგმა 102%-ით შეასრულა. აქტიური საპრივატიზებო საქმიანობის  შედეგად, სახელმწიფო ბიუჯეტში ჯამურად - 217 236 571 ლარი ჩაირიცხა, მაშინ როდესაც წლიური გეგმა  213 000 000 ლარს შეადგენდა.

საანგარიშგებო პერიოდში სააგენტომ 821 ელექტრონული აუქციონი გამოაცხადა, რომლის ფარგლებშიც აუქციონის წესით 529 ობიექტი გაიყიდა.

სახელმწიფო ქონების ეროვნული სააგენტო უძრავი ქონების პრივატიზების პარალელურად, აქტიურად ახორციელებს მოძრავი ქონების გასხვისებასაც ელექტრონული აუქციონის ფორმით. 2025 წელს  გაყიდულმა მოძრავი ქონების ჯამურმა ღირებულებამ 12 047 986 ლარი შეადგინა. 

ელექტრონულ პორტალზე eauction.ge-ზე რეგისტრაცია და აუქციონებში მონაწილეობის შესაძლებლობა აქვს ნებისმიერ დაინტერესებულ პირს, მათ შორის - საკუთარი სარეალიზაციო ქონების განთავსების მიზნით.

სააგენტო აქტიურად აგრძელებს სახელმწიფო ქონების დაჩქარებული პრივატიზაციის პროცესს და კერძო სექტორს პროაქტიულად სთავაზობს როგორც უძრავ, ისე მოძრავ ქონებას. პრივატიზების პროცესი სრულად გამჭვირვალე და ყველასთვის ხელმისაწვდომია. დაინტერესებულ პირებს შეუძლიათ  ბიუროკრატიული პროცედურების გარეშე მონაწილეობა მიიღონ მიმდინარე ელექტრონულ აუქციონებში და მოკლე ვადაში გახდნენ სახელმწიფო აქტივების მესაკუთრეები.

„სპორტული ინფრასტრუქტურის განვითარების ხელშეწყობის სახელმწიფო პროგრამის” ფარგლებში, საქართველოს ეკონომიკის სამინისტროს სახელმწიფო ქონების ეროვნულმა სააგენტომ, შპს სპორტის აკადემია 2025-ს, 20 წლის ვადით, აღნაგობის უფლებით გადასცა ბავშვთა ქალაქ „მზიურის“ მიმდებარედ არსებული 11 650 კვ.მ. მიწის ნაკვეთი. პროგრამის პირობების მიხედვით, ინვესტორი აღნიშნულ უძრავ ქონებაზე სპორტული ინფრასტრუქტურის მოსაწყობად არანაკლებ 2 000 000 ლარის ინვესტიციას განახორციელებს. ტერიტორიაზე მოეწყობა ღია და დახურული ხელოვნურსაფარიანი სპორტული მოედნები, პადელის კორტები და სხვა საჭირო ინფრასტრუქტურა. ასევე, 200 ადამიანის ტევადობის ტრიბუნა და ავტოსადგომი.

შეგახსენებთ, რომ საქართველოს პრემიერ-მინისტრის ინიციატივით დამტკიცებული „სპორტული ინფრასტრუქტურის განვითარების ხელშეწყობის სახელმწიფო პროგრამის”, მიზანია ქვეყანაში სპორტის განვითარების, ჯანსაღი ცხოვრების პოპულარიზაციის და სპორტული ინფრასტრუქტურის შექმნის  ხელშეწყობა.

საქართველოს მთავრობის გადაწყვეტილებით, გურჯაანის მუნიციპალიტეტის მერიისა და სახელმწიფო რწმუნებულის ადმინისტრაციის შუამდგომლობის საფუძველზე, სახელმწიფო ქონების ეროვნულმა სააგენტომ 177 ფიზიკურ პირს, პირდაპირი მიყიდვის ფორმით, 1 ლარად საკუთრებაში გადასცა გურჯაანის მუნიციპალიტეტში მდებარე 256 ერთეული სახნავი კატეგორიის მიწის ნაკვეთი.

აღნიშნული პირები მრავალი წლის განმავლობაში ფლობენ და ამუშავებენ გურჯაანის მუნიციპალიტეტში მდებარე მიწის ნაკვეთებს, თუმცა საკუთრების უფლების დამადასტურებელი დოკუმენტაციის არ ქონის გამო, მოსახლეობა ვერ სარგებლობდა  სადაზღვევო სერვისით და სტიქიის შემთხვევაში, ვერ ახერხებდნენ ზარალის თავიდან აცილებას. შესაბამისად, დღევანდელი გადაწყვეტილება ხელს შეუწყობს ფერმერების მიერ წარმოებული აგრო პროდუქციის ზრდას და მათი სოციალურ-ეკნომიკური მდგომარეობის გაუმჯობესებას.

წარმატებით გრძელდება საქართველოს მთავრობის მიერ 2020 წელს ინიცირებული  „სასოფლო-სამეურნეო დანიშნულების მიწის რესურსზე ხელმისაწვდომობის სახელმწიფო პროგრამა“, რომლის მიზანია სოფლის მეურნეობის დარგის განვითარება და დამატებითი აქტივების მოზიდვა. აღნიშნული პროგრამის ფარგლებში  14 მოიჯარეს:  მცხეთის, ზუგდიდის, ჩხოროწყუს, მარტვილის, ხობის, ოზურგეთის, წყალტუბოსა და თელავის მუნიციპალიტეტებში, მათ მიერ იჯარით აღებული 14 ერთეული, ჯამურად - 43.245 ჰა სასოფლო-სამეურნეო (სახნავი) დანიშნულების მიწის ნაკვეთების გამოსყიდვის უფლება მიეცათ.

უძრავი ქონების ჯამური საბაზრო ფასი 1 296 164 ლარს შეადგენს, ხოლო დაინტერესებულ პირებს აღნიშნული უძრავი ქონება პირდაპირი მიყიდვის ფორმით, ჯამურად 972 125 ლარად (საბაზრო ფასის 75%) საკუთრებაში გადაეცემათ. გადაწყვეტილება  მთავრობის სხდომაზე იქნა მიღებული.

შეგახსენებთ, რომ პროგრამა ვრცელდება, იჯარით გაცემული სასოფლო-სამეურნეო მიწის ნაკვეთებზე, რომლებზეც განხორციელებულია სამეურნეო სამუშაოები  და მოიჯარეეებს აძლევს აღნიშნული მიწის ნაკვეთების გამოსყიდვის შესაძლებლობას. ამასთან, სახელმწიფო პროგრამის ფარგლებში იჯარის უფლებით გადაცემული უძრავი ნივთების გამოსყიდვა ხორციელდება სსიპ - ლევან სამხარაულის სახელობის სასამართლო ექსპერტიზის ეროვნული ბიუროს მიერ დადგენილი შესაბამისი უძრავი ქონების საბაზრო ფასის 75%-ის ოდენობით.

მთლიანობაში,   2020 წლიდან დღემდე პროგრამით 274 პირმა ისარგებლა. იჯარა-გამოსყიდვა განხორციელდა 337 სასოფლო-სამეურნეო დანიშნულების 1511 ჰა მიწის ნაკვეთებზე, რომელთა ჯამური საპრივატიზებო ღირებულება 26,905,363 ლარს შეადგენს. აღსანიშნავია, რომ პროგრამით სარგებლობის შესაძლებლობა გააჩნია სააგენტოს ყველა მოიჯარეს, ვინც აკმაყოფილებს პროგრამით დადგენილ კრიტერიუმებს, ყოველგვარი გამონაკლისის გარეშე.