ეკონომიკის სამინისტროს სახელმწიფო ქონების ეროვნულმა სააგენტომ, მიმდინარე წლის მესამე კვარტლის საპრივატიზებო გეგმა გადაჭარებებით, 216%-ით შეასრულა. აქტიური პრივატიზაციის შედეგად, სააგენტომ სახელმწიფო ბიუჯეტში, მესამე კვარტლის გეგმით გთვალისწინებული 38 მლნ ლარის ნაცვლად 82 052 542 ლარი გადარიცხა.  საანგარიშგებო პერიოდში გამოცხადდა 337 ელექტრონული აუქციონი.

მიმდინარე წელს, წარმატებული პრივატიზაციის შედეგად, გადაჭარბებით შესრულდა სამივე კვარტლის საპრივატიზებო გეგმა, შედეგად 9 თვის გეგმით გათვალისწინებული 111 000 000 ლარის ნაცვლად, სააგენტომ ცენტრალურ ბიუჯეტში 179 241 279 ლარის გადარიცხვა უზრუნველყო, რაც წლიური გეგმის 89,6%-ს შეადგენს.

სააგენტო აქტიურად აგრძელებს სახელმწიფო ქონების დაჩქარებული პრივატიზაციის პროცესს და კერძო სექტორს სხვადასხვა, საინვესტიციოდ მიმზიდველ უძრავ ქონებას პროაქტიულად შეთავაზებს. შეგახსენებთ, რომ პრივატიზების პროცესი გამჭვირვალე და ყველასთვის ხელმისაწვდომია. ნებისმიერ დაინტერესებულ პირს, შესაძლებლობა აქვს ყოველგვარი ბიუროკრატიული პროცედურების გარეშე მონაწილეობა მიიღოს მიმდინარე ელექტრონულ აუქციონებში და მოკლე დროში გახდეს სახელმწიფო აქტივის მესაკუთრე.

აქტიურად გრძელდება საცხოვრებელი პირობების გაუმჯობესების ხელშეწყობის პროცესი  დევნილი მოსახლეობისთვის. მთავრობის მორიგი გადაწყვეტილებით, სახელმწიფო ქონების ეროვნული სააგენტო კიდევ 220 დევნილ ოჯახს საკუთრებაში გადაცემს საცხოვრებელ ფართებს საქართველოს სხვადასხვა ქალაქში და მუნიციპალიტეტში, მათ შორის თბილისში, ქუთაისში, ბათუმში, რუსთავში, მცხეთაში, გორში, ხაშურში, ხონში, წყალტუბოში, გარდაბანში, ბოლნისში, თეთრიწყაროში, წალენჯიხაში, ფოთში, ზუგდიდში, აბაშასა და სენაკში - ჯამში ეს არის  239 ერთეული ქონება, რომელიც დევნილ ოჯახებს საკუთრებაში დაუკანონდებათ.

გარდა ამისა,  ბინათმესაკუთრეთა სამ ამხანაგობას,  რომლებიც  469 დევნილ ოჯახს ( 1435 ადამიანს) აერთიანებს, თბილისში გადაეცემათ და დაუკანონდებათ საერთო სარგებლობაში არსებული ფართები (სხვენები, სარდაფები და ა.შ.), რომლებსაც არაკომერციულად, სხვადასხვა საჭიროებისთვის წლების განმავლობაში იყენებდნენ, მაგრამ ამ დრომდე არ ჰქონდათ საკუთრებაში დარეგისტრირებული.

გადასაცემ ქონებებზე შუამდგომლობა წარმოადგინა დევნილთა, ეკომიგრანტთა და საარსებო წყაროებით უზრუნველყოფის სააგენტომ, შესაბამისად, ამ ოჯახების საცხოვრებელი პირობების გაუმჯობესების ხელშეწყობისთვის,  საქართველოს მთავრობამ, ეკონომიკის სამინისტროს ინიცირებით, კანონით მინიჭებული უფლებამოსილების ფარგლებში, გამოხატა კეთილი ნება და მიიღო გადაწყვეტილება, რომ ეს საცხოვრებელი ფართები და მიწის ნაკვეთები, საკუთრების უფლებით დაუკანონდეთ მათ ფაქტობრივ მფლობელებს.

ეკონომიკის სამინისტროს სახელმწიფო ქონების ეროვნულმა სააგენტომ,  ქ. რუსთავის მერიის  შუამდგომლობის საფუძველზე, რუსთავში მცხოვრებ 21 ოჯახს მათ ფაქტიურ სარგებლობაში არსებული ბინები საკუთრებაში უსასყიდლოდ გადასცა.

აღნიშნული პირები წლების მანძილზე სარგებლობდნენ სახელმწიფოს საკუთრებაში არსებული უძრავი ქონებით და ვერ ახერხებდნენ  ბინების საკუთრებაში რეგისტრაციას.

საქართველოს მთავრობის მიერ ინიცირებული  „სახელმწიფო საკუთრებაში არსებული საძოვრების ხელმისაწვდომობის სახელმწიფო პროგრამის“ ფარგლებში, სხვადასხვა მუნიციპალიტეტებში მდებარე საძოვრის კატეგორიის 68 ერთეული მიწის ნაკვეთი, 39 ფიზიკურ პირს  და 3 კომპანიას დროებით სარგებლობაში გადაეცა.

ეკონომიკის სამინისტროს სახელმწიფო ქონების ეროვნული სააგენტოსა და სსიპ „მიწის მდგრადი მართვისა და მიწათსარგებლობის მონიტორინგის ეროვნული სააგენტოს“ აქტიური მუშაობის შედეგად, დედოფლისწყაროს, სიღნაღის, ასპინძის, ახალქალაქის, საგარეჯოს, თელავის, ყაზბეგის, თეთრიწყაროს, დმანისის, მარნეულის, ნინოწმინდას მუნიციპალიტეტებში მდებარე 68 ერთეული მიწინ ნაკვეთი, ჯამში 5 362 ჰა საძოვარი ფერმერებს, იჯარის უფლებით, 3 წლის ვადით გადაეცათ.

შეგახსენებთ, რომ 2021 წლის 6 ოქტომბრის N497 დადგენილებით განსაზღვრული „სახელმწიფო საკუთრებაში არსებული საძოვრების ხელმისაწვდომობის სახელმწიფო პროგრამის დამტკიცების შესახებ“ პროგრამის ფარგლებში, დღეის მდგომარეობით,  155 პირს, 223 ერთეული, ჯამში 17 904  ჰა.  სასოფლო-სამეურნეო (საძოვარი) კატეგორიის მიწის ნაკვეთი,  პირდაპირი ფორმით, იჯარის უფლებით, 3 წ. ვადით დროებით სარგებლობაში გადაეცა.

სახელმწიფო საკუთრებაში არსებული საძოვრების ხელმისაწვდომობის სახელმწიფო პროგრამა 2021 წელს დამტკიცდა. მისი მიზანია საქართველოს ტერიტორიაზე სახელმწიფოს საკუთრებაში არსებული საძოვრების რაციონალურად გამოყენებისა და ხელმისაწვდომობის ხელშეწყობა, საძოვრების დეგრადაციის პრევენცია, მეცხოველეობის განვითარებია და ადგილობრივი პროდუქციის წარმოების ხელშეწყობა, ასევე მეცხოველეობის სფეროში დასაქმებული ფერმერებისთვის სოციალურ-ეკონომიკური მდგომარეობის გაუმჯობესება.

პროგრამაში მონაწილეობის მიღების უფლება აქვს ნებისმიერ პირს, რომელსაც შერჩეული საძოვარი და, ამავდროულად, განაცხადის წარდგენისას მას ან მის მეპაიეს მფლობელობაში აქვს იჯარის უფლებით გასაცემი საძოვრის ასათვისებლად საკმარისი რაოდენობის მსხვილფეხა ან წვრილფეხა რქოსანი პირუტყვი.

დევნილი მოსახლეობის საცხოვრებელი პირობების გაუმჯობესების ხელშეწყობის ფარგლებში, საქართველოს მთავრობამ, ეკონომიკის სამინისტროს ინიცირებით,  მორიგი განკარგულება დაამტკიცა,   რომლის მიხედვით, კიდევ 150 დევნილ ოჯახს საკუთრებაში გადაეცემა საცხოვრებელ ბინები საქართველოს სხვადასხვა ქალაქსა და მუნიციპალიტეტში, მათ შორის თბილისში, ქუთაისში, წყალტუბოში, მცხეთაში, გორში, მარნეულსა და ზუგდიდში - ჯამში  153 ერთეული ქონება დევნილ ოჯახებს დაუკანონდებათ.

გადასაცემ ქონებაზე სახელმწიფო ქონების ეროვნულ სააგენტოში შუამდგომლობა წარადგინა დევნილთა, ეკომიგრანტთა და საარსებო წყაროებით უზრუნველყოფის სააგენტომ, შესაბამისად, ამ ოჯახების საცხოვრებელი პირობების გაუმჯობესების ხელშეწყობისთვის,  საქართველოს მთავრობამ, ეკონომიკის სამინისტროს ინიცირებით, კანონით მინიჭებული უფლებამოსილების ფარგლებში, მიიღო გადაწყვეტილება,  საცხოვრებელი ფართები საკუთრების უფლებით  მათ ფაქტობრივ მფლობელებს დაუკანონდეთ.

საქართველოს მთავრობისთვის პრიორიტეტს წარმოადგენს დევნილი ოჯახების სათანადო საცხოვრებლით უზრუნველყოფა და ცხოვრების ღირსეული პირობების შექმნა. შესაბამისად, ბოლო წლების განმავლობაში, ძალიან აქტიურად მიმდინარეობს მათი, როგორც საცხოვრებელი ბინებითა და დამხმარე ფართებით, ასევე სასოფლო-სამეურნეო მიწის ნაკვეთებით უზრუნველყოფა და ეს პროცესი მომავალშიც აქტიურად გაგრძელდება. მთავრობის  ამოცანაა,  არც ერთი დევნილი ოჯახი არ დარჩეს სახელმწიფოს ყურადღების გარეშე.

გერმანიის ფედერაციული რესპუბლიკის ფინანსთა სამინისტროსა და სახელმწიფო ქონების ეროვნულ სააგენტოს შორის არსებული თანამშრომლობის ფარგლებში,  სააგენტოს თავმჯდომარემ გიორგი დუგლაძემ გერმანიის ფინასთა სამინისტროს მერვე დივიზიონის წარმომადგენელს  ბ-ნ ანდრეას კერსტს  და GIZ-ის და Berlin Economics-ის წარმომადგენლებს უმასპინძლა.

გაცნობებთ, რომ ფინანსთა სამინისტროს აღნიშნული დანაყოფი პასუხისმგებელია გერმანიაში სახელმწიფო საკუთრებაში არსებული ქონების მართვა-განკარგვაზე.
შეხვედრაზე მხარეებმა განიხილეს სააგენტოს ქონებებზე სრული საინვესტიციო შეთავაზების მომზადების (ფინანსური, არქიტექტურული და სოციალური ზეგავლენის შეფასება) საკითხები. ასევე, გერმანული, ევროპული და საერთაშორისო ინვესტიციების მოზიდვის კუთხით არსებული შესაძლებლობები. სამუშაო შეხვერდრებზე განისაზღვრა სამომავლო ტრეინინგების თემატიკა, რაც გულისხმობს გერმანიის საუკეთესო პრაქტიკის გაზიარებას და სამომავლო მხარდაჭერას გერმანიის ფინანსთა სამინისტროს და GIZ-მხრიდან.

შეგახსენებთ, რომ აღნიშნული პროექტი მიმდინარეობს 2016 წლიდან GIZ-ის მხარდაჭერით. მხარეებს შორის თანამშრომლობა მოიცავს პრივატიზებისა და სახელმწიფო ქონების მართვის საკითხებში გერმანული მხარის გამოცდილების გაზიარებას.

საქართველოს მთავრობის გადაწყვეტილებით, ეკონომიკის სამინისტროს სსიპ სახელმწიფო ქონების ეროვნული სააგენტო, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს შუამდგომლობით, თბილისში, ქუთაისში, რუსთავში, მარნეულში, სამტრედიაში, მცხეთაში, გორში, ქარელში, ახალციხეში, ზუგდიდში, წალენჯიხაში, ჩხოროწყუში, ხობში, სენაკში, ჯვარში, გარდაბანში, დუშეთში, თეთრიწყაროში, გურჯაანსა და წყალტუბოში  მცხოვრებ 331 დევნილ ოჯახს სახელმწიფო საკუთრებაში არსებულ და მათ მიერ ფაქტობრივად დაკავებულ 360 ქონებას - საცხოვრებელი ფართებს და მიწის ნაკვეთებს დაუკანონებს.

გარდა ამისა, თბილისსა და ბათუმში, ბინათმესაკუთრეთა ხუთ ამხანაგობას, სადაც ჯამურად რეგისტრირებულია 110 დევნილი ოჯახი, სიმბოლურ ფასად, 1 ლარად გადაეცემა სახელმწიფოს საკუთრებაში არსებული 60 ფართი, რომელიც მათ ფაქტობრივ სარგებლობაშია.

საქართველოს მთავრობისთვის პრიორიტეტს წარმოადგენს დევნილი ოჯახების სათანადო საცხოვრებლით უზრუნველყოფა და ცხოვრების ღირსეული პირობების შექმნა. შესაბამისად, ბოლო წლების განმავლობაში, ძალიან აქტიურად მიმდინარეობს მათი, როგორც საცხოვრებელი ბინებითა და დამხმარე ფართებით, ასევე სასოფლო-სამეურნეო მიწის ნაკვეთებით უზრუნველყოფა და ეს პროცესი მომავალშიც აქტიურად გაგრძელდება. მთავრობის  ამოცანაა,  არც ერთი დევნილი ოჯახი არ დარჩეს სახელმწიფოს ყურადღების გარეშე.

ეკონომიკის სამინისტროს სახელმწიფო ქონების ეროვნულმა სააგენტომ, მიმდინარე წლის პირველი კვარტლის საპრივატიზებო გეგმა გადაჭარბებით შეასრულა. აქტიური პრივატიზების შედეგად, სააგენტომ ჯამში 79 707 625 ლარის მობილიზება მოახდინა, საიდანაც საპრივატიზებო გეგმით გათვალისწინებული 36 000 000 ლარის ნაცვლად სახელმწიფო ბიუჯეტში 60 086 446 ლარის გადარიცხვა უზრუნველყო, შედეგად, პირველი კვარტლის გეგმა გადაჭარბებით 167%-ით შესრულდა. აღნიშნულ პერიოდში სააგენტომ 463 ელექტრონული აუქციონი გამოაცხადა.

სააგენტო აქტიურად აგრძელებს სახელმწიფო ქონების დაჩქარებული პრივატიზაციის პროცესს და კერძო სექტორს სხვადასხვა, საინვესტიციოდ მიმზიდველ უძრავ ქონებას პროაქტიულად შეთავაზებს.

მოგახსენებთ, რომ პრივატიზების პროცესი გამჭვირვალე და ყველასთვის ხელმისაწვდომია. ნებისმიერ დაინტერესებულ პირს, შესაძლებლობა აქვს ყოველგვარი ბიუროკრატიული პროცედურების გარეშე მონაწილეობა მიიღოს მიმდინარე ელექტრონულ აუქციონებში და მოკლე დროში გახდეს სახელმწიფო აქტივის მესაკუთრე.

საქართველოს მთავრობის გადაწყვეტილებით, ეკონომიკის სამინისტროს სსიპ სახელმწიფო ქონების ეროვნული სააგენტო,  საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს შუამდგომლობით, სვანეთის, მაღალმთიანი აჭარის სტიქიური მოვლენების შედეგად დაზარალებულ და  გადაადგილებულ 27 ოჯახს საცხოვრებელ ფართებს გადასცემს.

გადასაცემი ქონება მდებარეობს ქ. წალკაში და წალკის, ლაგოდეხის, თეთრიწყაროსა და ნინოწმინდის მუნიციპალიტეტის სოფლებში.

აღნიშნული გადაწყვეტილებით 27 ოჯახი დაკმაყოფილდება საცხოვრისით, რაც  სახელმწიფოს მხრიდან სტიქიური მოვლენების შედეგად დაზარალებულ და გადაადგილებული ოჯახების მიმართ სათანადო საცხოვრებლით უზრუნველყოფას და ცხოვრების ღირსეული პირობების შექმნას ემსახურება.

აქტიურად გრძელდება საქართველოს მთავრობის მიერ 2020 წელს ინიცირებული  „სასოფლო-სამეურნეო დანიშნულების მიწის რესურსზე ხელმისაწვდომობის სახელმწიფო პროგრამა“, რომლის მიზანია სოფლის მეურნეობის დარგის განვითარება და დამატებითი აქტივების მოზიდვა. აღნიშნული პროგრამის ფარგლებში, დამატებით 8 მოიჯარეს, ამბროლაურის, ხობის, წყალტუბოს, ლაგოდეხის, ახალციხის და საგარეჯოს მუნიციპალიტეტებში, მათ მიერ იჯარით აღებული 13 ერთეული, ჯამურად - 38,9 ჰა სასოფლო-სამეურნეო (სახნავი/სათიბი) დანიშნულების მიწის ნაკვეთების გამოსყიდვის უფლება მიეცათ.

უძრავი ქონების ჯამური საბაზრო ფასი 634 828 ლარს შეადგენს. გადაწყვეტილება დღევანდელ მთავრობის სხდომაზე იქნა მიღებული.

შეგახსენებთ, რომ პროგრამა ითვალისწინებს იჯარით გაცემული სასოფლო-სამეურნეო მიწის ნაკვეთების, რომლებზეც განხორციელებულია სამეურნეო სამუშაოები, მოიჯარეთათვის გამოსყიდვის შესაძლებლობის მიცემას. ამასთან, სახელმწიფო პროგრამის ფარგლებში იჯარის უფლებით გადაცემული უძრავი ნივთების გამოსყიდვა ხორციელდება სსიპ - ლევან სამხარაულის სახელობის სასამართლო ექსპერტიზის ეროვნული ბიუროს მიერ დადგენილი შესაბამისი უძრავი ქონების საბაზრო ფასის 75%-ის ოდენობით.

მთლიანობაში,   2020 წლიდან დღემდე პროგრამით 242 პირმა ისარგებლა. იჯარა-გამოსყიდვა განხორციელდა 295 სასოფლო-სამეურნეო დანიშნულების 1 365 ჰა მიწის ნაკვეთებზე, რომელთა ჯამური საპრივატიზებო ღირებულება 28 900 334 ლარს შეადგენს.აღსანიშნავია, რომ პროგრამით სარგებლობის შესაძლებლობა გააჩნია სააგენტოს ყველა მოიჯარეს, ვინც აკმაყოფილებს პროგრამით დადგენილ კრიტერიუმებს, ყოველგვარი გამონაკლისის გარეშე.