საქართველოს ეკონომიკისა და მდგრადი განვითარების სამინისტროს სსიპ „სახელმწიფო ქონების ეროვნულმა სააგენტომ“ პირველი მარტის  მდგომარეობით ქვეყნის მასშტაბით 14 168 მიწის ნაკვეთის (3 362ჰა) აზომვითი ნახაზის მომზადების საფასური აანაზღაურა, რაც   ჯამში 1 123 240 ლარს შეადგენს.

გაცნობებთ, რომ საქართველოს მთავრობის გადაწყვეტილებით პირველი აგვისტოდან ამოქმედდა კანონი, რომელიც მიწის რეგისტრაციას ამარტივებს და მას მოქალაქეთათვის მაქსიმალურად ხელმისაწვდომს ხდის. პროექტის ფარგლებში ეკონომიკისა და მდგრადი განვითარების სსიპ სახელმწიფო ქონების ეროვნული სააგენტო ახორციელებს სასოფლო-სამეურნეო დანიშნულების მიწის ნაკვეთების აზომვითი ნახაზის მომზადების ხარჯების ამზომველთათვის ანაზღაურებას. ასანაზღაურებელი თანხის მთლიანი მოცულობა ერთ ნახაზზე 1,5 ჰა-მდე მიწის ნაკვეთის აზომვის შემთხვევაში შეადგენს 80 ლარს, ხოლო 1,5 ჰა-დან 5 ჰა-მდე მიწის ნაკვეთებზე 100 ლარს.

საქართველოს ეკონომიკისა და მდგრადი განვითარების სამინისტროს სსიპ „სახელმწიფო ქონების ეროვნულმა სააგენტომ“ შპს ,,მეგრულ ჩაის“  25 წლის ვადით იჯარით სახელმწიფო საკუთრებაში არსებული, მარტვილის მუნიციპალიტეტში, სოფელ ტალერში მდებარე 165 465 კვ.მ.  და ამავე მუნიციპალიტეტში, სოფელ კურზუში მდებარე 182 790 კვ.მ. სასოფლო-სამეურნეო (სახნავი) დანიშნულების მიწის ნაკვეთი გადასცა.

კომპანია უზრუნველყოფს ჩაის გადამამუშავებელი საწარმოს მშენებლობას, ექსპლუატაციაში მიღებასა და აღჭურვას. უახლოეს მომავალში, ქართულ ბაზარზე, სურსათის ხარისხისა და  უვნებლობის მართვის საერთაშორისო სისტემის (HACCP) შესაბამისი ჩაი გამოვა.  

შპს ,,მეგრულ ჩაის“   აღნიშნული მიწის ნაკვეთი ჩაის პლანტაციების რეაბილიტაციის სახელმწიფო პროგრამის „ქართული ჩაის“ ფარგლებში გადაეცა. სასოფლო–სამეურნეო მიწის ნაკვეთის წლიური საიჯარო ქირა  1 742 ლარს შეადგენს.

ჩაის პლანტაციების რეაბილიტაციის სახელმწიფო პროგრამა მიზნად ისახავს როგორც კერძო, ასევე სახელმწიფო საკუთრებაში არსებული გაველურებული ჩაის პლანტაციების რეაბილიტაციას, საქართველოში არსებული ჩაის პლანტაციების პოტენციალის ეფექტურად გამოყენებას, ქარული ჩაის საექსპორტო პოტენციალის გაზრდას და რეგიონში მოსახლეობის დასაქმებას, რაც თავის მხრივ ხელს შეუწყობს მოსახლეობის სოციალურ-ეკონომიკური მდგომარეობის გაუმჯობესებას.

23 და 24   თებერვალს სსიპ სახელმწიფო ქონების ეროვნულ სააგენტოში გაიმართა სამუშაო შეხვედრა გერმანიის ფედერაციული რესპუბლიკის ფინანსთა სამინისტროს ექსპერტებს და სააგენტოს  თანამშრომლებს შორის.  აღნიშნული შეხვედრები ხორციელდება გერმანიის ფედერაციული რესპუბლიკის ფინანსთა სამინისტროსთან ერთად, GIZ-ის მხარდაჭერით.

თანამშრომლობა მიზნად ისახვას პრივატიზების სფეროში გამოცდილების გაზიარებას. მიმდინარე შეხვედრების თემა იყო  გერმანიის ფოსტის პრივატიზების სქემის და სახელმწიფო საწარმოების მმართველობის გერმანული მოდელის გაცნობა. შეხვედრას უძღვებოდნენ გერმანიის ფედერაციული რესპუბლიკის ფინანსთა სამინისტროს ექსპერტები. შეხვედრას სააგენტოს პრივივატიზების დეპარტამენტის თანამშრომლოებთან ერთად ესწრებოდნენ „საქართველოს ფოსტის“ წარმომადგენლებიც.

აღნიშნული შეხვედრით დასრულდა გერმანული დელეგაციის ორდღიანი ვიზიტი საქართველოში და ურთიერთთანამშრომლობის პროექტის მორიგი,  რიგით მესამე შეხვედრა.

ონის მუნიციპალიტეტში, სოფელ წედისში საერთაშორისო სტანდარტების შესაბამისი ფერმა აშენდება, რომელიც სულ მცირე 60 სულ მსხვილფეხა რქოსან პირუტყვზე იქნება გათვლილი. ფერმის აშენებისა და მოწყობის მიზნით კომპანია მინიმუმ  

95 000 ლარის ინვესტიციას განახორციელებს.რაჭის რეგიონში მეცხოველეობის განვითარების ხელშეწყობის მიზნით საქართველოს ეკონომიკისა და მდგრადი განვითარების სამინისტროს სსიპ „სახელმწიფო ქონების ეროვნულმა სააგენტომ“ შპს „ ლოდინაროს“ ონის მუნიციპალიტეტში, სოფელ  წედისში მდებარე  4 000 კვ.მ.  სათიბი მიწის ნაკვეთი 25 წლიანი იჯარით გადასცა. წლიური საიჯარო ქირა 1062 ლარს შეადგენს.

გაცნობებთ, რომ შპს „ ლოდინარო“ თანამშრომლობს შვეიცარულ-ქართულ კომპანია შპს „ბლაუნშტაინ საქართველოსთან“ და ჩართულია რაჭის რეგიონში მეცხოველეობის განვითარების პროექტში. პროექტი ითვალისწინებს შვეიცარული ჯიშის მსხვილფეხა რქოსანი პირუტყვის ადგილობრივ ჯიშთან შეჯვარებას და ჩვენი რეგიონისთვის ოპტიმალური ჯიშის მსხვილფეხა რქოსანი პირუტყვის  მოშენებას.

მცხეთის მუნიციპალიტეტში, სოფელ აღდგომიანთკარში  შპს „GOLDEN GRAINS“ ცხოველების, ფრინველების და თევზების საკვების მწარმოებელ საწარმოს შექმნის. კომპანია აღნიშნული მიმართულებით  174 980 ლარის ინვესტიციას განახორციელებს, რაც, თავის მხრივ, ადგილობრივ ბაზარზე გაზრდის ქართული პროდუქციის წარმოების რაოდენობას და დადებითად აისახება ეკონომიკური პროცესების განვითარებაზე.  კომპანია წლიურად არანაკლებ 5000  ტონა ცხოველების საკვების წარმოებას გეგმავს.

საქართველოს ეკონომიკისა და მდგრადი განვითარების სამინისტროს სსიპ სახელმწიფო ქონების ეროვნულმა სააგენტომ სამთავრობო პროგრამა „აწარმოე საქართველოში“ ფარგლებში „GOLDEN GRAINS“  მცხეთის მუნიციპალიტეტში, სოფელ აღდგომიანთკარში მდებარე 3877.00 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობა გადასცა.

ამასთან, გაცნობებთ, რომ სამთავრობო პროგრამა „აწარმოე საქართველოში“ ფარგლებში მხარდაჭერილია 226 პროექტი, რომელთა ჯამური ინვესტიციის მოცულობა შეადგენს  505 420 000 ლარს.

საწარმოებში სამუშაო ადგილზე უსაფრთხო და ჯანსაღი გარემოს შექმნის მიზნით, საქართველოს ეკონომიკისა და მდგრადი განვითარების სამინისტროს სსიპ „სახელმწიფო ქონების ეროვნული სააგენტოს“ თავმჯდომარის პირველმა მოადგილემ მირიან ჩაჩავამ და საქართველოს შრომის, ჯანმრთელობისა და სოციალური დაცვის სამინისტროს შრომის პირობების ინსპექტირების დეპარტამენტის უფროსმა ლევან ჟორჟოლიანმა ხელი მოაწერეს ურთიერთთანამშრომლობის მემორანდუმს.  მემორანდუმი  სახელმწიფოს  50%-ზე მეტი წილობრივი მონაწილეობით დაფუძნებულ საწარმოებში ჯანდაცვის სამინისტროს შესაბამისი დეპარტამენტის მიერ შრომის უსაფრთხოების ცენტრალიზებული ინსპექტირების განხორციელებას გულისხმობს.

შრომითი უსაფრთხოების ინსპექტირების განხორციელების მემორანდუმის მიზანია სახელმწიფო საწარმოებში შრომის უსაფრთხოების დაცვასთან დაკავშირებით ინსპექტირების ჩატარება,  სამუშაო ადგილზე შრომის უსაფრთხოების ინსპექტირების შედეგად გამოვლენილ დარღვევებზე შესაბამისი რეკომენდაციების შემუშავება, სახელმწიფო საწარმოსთვის წარდგენა და სახელმწიფო ქონების ეროვნული სააგენტოსთვის გაცნობა, რეკომენდაციების საფუძველზე სახელმწიფო საწარმოებში შეხვედრების ორგანიზება.

საქართველოს ეკონომიკისა და მდგრადი განვითარების სამინისტროს სსიპ „სახელმწიფო ქონების ეროვნულმა სააგენტომ“  მთავარი პროკურატურის შუამდგომლობის საფუძველზე ოთხ დაზარალებულ მოქალაქეს და ერთ იურიდიულ პირს - კომპანია „აკვარიუმს“  2010-2011 წლებში მიყენებული ზიანის კომპენსირების მიზნით, სიმბოლურ ფასად 1 ლარად, სახელმწიფო საკუთრებაში არსებული უძრავი და მოძრავი ქონება საკუთრებაში გადასცა.

კერძოდ, ხელვაჩაურის მუნიციპალეტის სოფელ გონიოში მდებარე 1403 კვ.მ არასასოფლო-სამეურნეო დანიშნულების მიწის ნაკვეთი, ხელვაჩაურის მუნიციპალიტეტის სოფელ კვარიათში მდებარე 200 კვ.მ არასასოფლო-სამეურნეო დანიშნულების მიწის ნაკვეთი, ქ. ბათუმში, ასათიანის ქუჩაზე მდებარე 54.30 კვ.მ ბინა, “Hyundai tucson”-ის მარკის ავტომანქანა, ასევე  5 ერთეული „Hyundai IX35” და 1 ერთეული “Hyundai sonata”-ს მარკის ავტომანქანა.

საქართველოს მთავარი პროკურატურის მიერ ჩატარებული გამოძიების შედეგად დადგინდა, რომ 2010-2011 წლებში ადგილი ჰქონდა  ზემოხსენებულ ფიზიკურ და იურიდიულ პირზე ზეწოლას, კერძოდ, უძრავი და მოძრავი ნივთების სახელმწიფოსათვის იძულებით გადაცემის ფაქტს. გადაწყვეტილება ქონებების დაბრუნების შესახებ  9 თებერვლის მთავრობის სხდომაზე იქნა მიღებული.