„პრაიმტაიმის“ პრეს-კლუბში, სმენისა და მეტყველების დარღვევის მქონე ბავშვთა დახმარების ასოციაციამ პრესკონფერენცია გამართა, რომელზეც სსიპ სახელმწიფო ქონების ეროვნული სააგენტო მიიწვია. პრესკონფერენციაზე ასოციაციის თავმჯდომარემ მაია ასაკაშვილმა მადლობა გადაუხადა საქართველოს მთავრობას, ეკონომიკის სამინისტროსა და სახელმწიფო ქონების ეროვნულ სააგენტოს გაწეული თანადგომისათვის.

სახელმწიფო ქონების ეროვნულმა სააგენტომ სმენისა და მეტყველების დარღვევის მქონე ბავშვთა დახმარების ასოციაციას 10 წლის ვადით უსასყიდლოდ გადასცა თემქაზე, ირემაშვილის ქუჩაზე, მდებარე ყოფილი სკოლა-პანსიონატის შენობა. შენობაში მრავალპროფილიანი ცენტრი განთავსდება, სადაც შშმ პირები სხვადასხვა პროფესიას დაეუფლებიან, რაც გაზრდის მათ კონკურენტუნარიანობას შრომის ბაზარზე და ხელს შეუწყობს საზოგადოებაში მათ ინტეგრაციას. ცენტრი მოემსახურება 18 წლამდე და 60 წლის ასაკის ზემოთ ბენეფიციარებს.

სახელმწიფო ქონების ეროვნული სააგენტოს თავმჯდომარის პირველმა მოადგილემ ეკატერინე სისაურმა პრესკონფერენციაზე განაცხადა, რომ 2013 წლიდან ფუნქციონირებს კომისია, რომლის მიზანია არასამთავრობო ორგანიზაციებსა და სახელმწიფო უწყებებს შორის თანამშრომლობის ხელშეწყობა, და აღნიშნული კონტინგენტისთვის სახელმწიფო საკუთრებაში არსებული შენობა-ნაგებობების უსასყიდლოდ, სარგებლობის უფლებით გადაცემა. „ეკონომიკისა და მდგრადი განვითარების სამინისტრო მომავალშიც მზად არის, ხელი შეუწყოს არასამთავრობო ორგანიზაციებს მსგავსი პროექტების განხორციელებაში“.

ცენტრი 2015 წლიდან ამოქმედდება. მის გარემონტებას ასოციაცია დონორი ორგანიზაციების დახმარებით უზრუნველყოფს. ხოლო სწავლებას სახელმწიფო დააფინანსებს. 

სახელმწიფო პროგრამის "აწარმოე საქართველოში“ ინფრასტრუქტურული კომპონენტის ფარგლებში საქართველოს მთავრობამ კიდევ სამი პროექტი დაამტკიცა და დაინტერესებულ მეწარმეებს ახალი საწარმოების შესაქმნელად სახელმწიფო საკუთრებაში არსებული ქონება სიმბოლურ ფასად გადაეცათ. სახელმწიფო პროგრამის პირობების თანახმად, გადაცემულ ობიექტებზე ორი წლის განმავლობაში მნიშვნელოვანი ინვესტიციები განხორცილდება და სხვადასხვა მიმართულების ახალი საწარმოები ამუშავდება. 

შპს „ჯეოკეპს“ სიმბოლურ ფასად, ერთ ლარად, გადაეცა თბილისში, ორხევის დასახლებაში მდებარე 15 003 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობები, რომელთა საერთო ღირებულება 437 000 ლარია. სანაცვლოდ კომპანია ვალდებულია განახორციელოს არანაკლებ 2 622 000 ლარის ინვესტიცია, ორი წლის განმავლობაში შექმნას პლასტმასის პროდუქციის საწარმო და დაასაქმოს 45 ადამიანი.

ქაღალდისა და არაქსოვილი მასალისგან დამზადებული შესაფუთი და ერთჯერადი მოხმარების პროდუქციის საწარმო ამოქმედდება ასევე თბილისში, დავით აღმაშენებლის ხეივნის მე-13 კმ.ზე, სადაც საქართველოს მთავრობამ ინდ. მეწარმე ეკატერინე აბრამიას ასევე ერთ ლარად გადასცა 236 000 ლარად შეფასებული 2587 კვ.მ არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობები. მეწარმე არანაკლებ 1 416 000 ლარის ინვესტიციის განხორციელებას და მინიმუმ 40 ადამიანის დასაქმებას გეგმავს. 

50-70 ადამიანს დაასაქმებს ასევე შპს „ჯეო კონცენტრატი“ ხილის, კენკროვნებისა და ბოსტნეულის გადამამუშავებელ საწარმოში, რომლის ამოქმედებისთვის არანაკლებ 332 000 ლარის ინვესტიცია განხორციელდება. საწარმო გორის რაიონის სოფელ კარალეთში სახელმწიფოს მიერ სიმბოლურ ფასად გადაცემულ ობიექტზე ამუშავდება. „ჯეო კონცენტრატისთვის“ გადაცემული მიწის ნაკვეთის ფართობი 20 067 კვადრატული მეტრია და მასზე განთავსებულ შენობებთან ერთად 83 000 ლარად არის შეფასებული. 

სახელმწიფო პროგრამა "აწარმოე საქართველოში“ პირველი ივნისიდან ამოქმედდა და ინფრასტრუქტურული კომპონენტის ფარგლებში უკვე ხუთი პროექტია დამტკიცებული.

18 ივნისს, გორში, სახელმწიფო უნივერსიტეტის შენობაში ადგილობრივი ბიზნეს-სექტორისთვის სახელმწიფო პროგრამის „აწარმოე საქართველოში“ პრეზენტაცია გაიმართა. ღონისძიებას ესწრებოდნენ სოფლის მეურნეობის მინისტრი შალვა ფიფია, საქართველოს ეკონომიკისა და მდგრადი განვითარების მინისტრის მოადგილე ქეთევან ბოჭორიშვილი, შიდა ქართლში სახელმწიფო რწმუნებულ-გუბერნატორი ზურაბ რუსიშვილი, ასევე - მეწარმეობის განვითარების, სოფლის მეურნეობის პროექტების განვითარებისა და სახელმწიფო ქონების ეროვნული სააგენტოების წარმომადგენლები.

შეხვედრაზე ორასამდე ადგილობრივი კომპანია იყო მოწვეული. მათთვის პროგრამის დეტალური პრეზენტაცია გააკეთა ეკონომიკისა და მდგრადი განვითარების მინისტრის მოადგილემ, ქეთევან ბოჭორიშვილმა. განხილულ იქნა სახელმწიფო პროგრამის მიმართულებები, კონკრეტული სექტორები და ის პირობები, რომლითაც მთავრობა ხელს უწყობს ახალი საწარმოების შექმნას და ადგილობრივი პროდუქციის წარმოების განვითარებას. პრეზენტაციის შემდეგ მეწარმეებს საშუალება ჰქონდათ დაესვათ კითხვები და დეტალური ინფორმაცია მიეღოთ ეკონომიკისა და სოფლის მეურნეობის სამინისტროს ხელმძღვანელი პირებისგან.

სოფლის მეურნეობის მინისტრის, შალვა ფიფიას განცხადებით, რეგიონული ტურნეს ფარგლებში და პროგრამის მნიშვნელობიდან გამომდინარე, მსგავსი შეხვედრები საქართველოს სხვა რაიონებშიც გაგრძელდება.

სააგენტოს აღნიშნული ღონისძიებისთვის მოწყობილი ჰქონდა თავისი კუთხე, სადაც განთავსებული იყო პროექტის სარეკლამო მასალები და შეთავაზებული საწარმოების პრეზენტაციები. სააგენტოს მომსახურების ცენტრისა და ქოლ-ცენტრის თანამშრომლები კონსულტაციას უწევდნენ დაინტერესებულ მეწარმეებს და აცნობდნენ სააგენტოს შეთავაზებებს. სტუმრებს შესაძლებლობა ჰქონდათ დეტალურად გაცნობოდნენ პროგრამას, აღნიშნული საწარმოების ჩამონათვალს და დაესვათ შესაბამისი კითხვები მათვის საინტერესო საკითხებზე. 

ღია კარის დღეზე ასევე წარმოდგენილი იყვნენ ბანკები, რომლებიც დაინტერესებულ პირებს კონსულტაციას უწევდნენ ფინანსური მხარდაჭერის კომპონენტის ფარგლებში. 

13 ივნისს, სსიპ სახელმწიფო ქონების ეროვნული სააგენტოს თავმჯდომარე დიმიტრი ქუმსიშვილმა იძულებით გადაადგილებულ პირთათვის საცხოვრებელი ფართების გადაცემა-დაკანონების თემაზე ბრიფინგი გამართა. თავმჯდომარის განცხადებით, საქართველოს პროფესიული კავშირების გაერთიანებამ სახელმწიფოს გადმოსცა დაბა წყნეთში განთავსებული 3 კორპუსი, მათი მიმდებარე ტერიტორია და თბილისის ზღვაზე მდებარე 6 შენობა.

აღნიშნული ქონება გადაეცათ იძულებით გადაადგილებულ პირებს, განსახლებისა და ლტოლვილთა სამინისტროს შუამდგომლობის საფუძველზე. ორივე ობიექტის საცხოვრებელი ფართი 262 ოჯახზე გადანაწილდება და შესაბამისი პროცედურების შემდეგ საკუთრებაში გადაეცემათ.

ზოგადად, მთელი ქვეყნის მასშტაბით იძულებით გადაადგილებულ პირებს 150-მდე ობიექტი გადაეცათ და 2000-მდე ოჯახს საკუთარი ბინა აქვს. სააგენტო სამინისტროებთან ერთად ამ მიმართულებით ინტენსიურად აგრძელებს მუშაობას.

12 ივნისს, სამთავრობო პროგრამა ,,აწარმოე საქართველოს“ ფარგლებში ინფრასტრუქტურული კომპონენტის პრეზენტაცია გაიმართა. ღონისძიება პროგრამაში ჩართულ ერთ-ერთ სამრეწველო დანიშნულების ობიექტზე, თბილისში, ორხევის დასახლებაში გაიმართა. ღონისძიებას სააგენტოს თავმჯდომარე დიმიტრი ქუმსიშვილი და ეკონომიკისა და მდგრადი განვითარების მინისტრის მოადგილე ქეთევან ბოჭორიშვილი უძღვებოდნენ.

სააგენტოს თავმჯდომარის განცხადებით, აღნიშნული ობიექტის მიწის ფართი, მასზე განთავსებული შენობა-ნაგებობით 15 ათას კვადრატულ მეტრს შეადგენს. დამოუკიდებელი აუდიტორის მიერ შეფასებული ინფრასტრუქტურული ობიექტის საბაზრო ღირებულება 430 000 ლარია. სახელმწიფო კი მას პროგრამით დაინტერესებულ მეწარმეს სიმბოლურ ფასად, 1 ლარად გადასცემს. პროგრამის თანახმად, მეწარმე ვალდებულია აღნიშნულ ქონებაზე განახორციელოს ექვსმაგი ოდენობის ინვესტიცია და 2 წლის განმავლობაში უზრუნველყოს პროდუქციის გამოშვება.

ინფრასტრუქტურული მხარდაჭერის კომპონენტს ადმინისტრირებას სსიპ სახელმწიფო ქონების ეროვნული სააგენტო უწევს. პროგრამის ფარგლებში იდენტიფიცირებული სახელმწიფო ქონება წარმოდგენილია ვებ-გვრედზე www.nasp.gov.ge. 

7 ივნისს ,სასტუმრო “ქორთიარდ მარიოტში“, ახალი სახელმწიფო პროგრამის “აწარმოე საქართველოში“ შესახებ ინფორმაციის გასაცნობად მეწარმეებისთვის ღია კარის დღე გაიმართა. ღონისძიებას 400-მდე ბიზნესმენი დაესწრო როგორც თბილისიდან, ასევე საქართველოს სხვადასხვა რეგიონიდან. 

შეხვედრას უძღვებოდნენ ეკონომიკისა და მდგრადი განვითარების მინისტრი გიორგი კვირიკაშვილი, სააგენტოს თავმჯდომარე დიმიტრი ქუმსიშვილი, მინისტრის მოადგილე ქეთევან ბოჭორიშვილი და სოფლის მეურნეობის სამინისტროს ხელმძღვანელი პირები. შეხვედრის დასაწყისში გაკეთდა პროგრამა “აწარმოე საქართველოში“ პრეზენტაცია. შემდეგ კი, ეკონომიკისა და მდგრადი განვითარების მინისტრმა გიორგი კვირიკაშვილმა და სააგენტოს თავმჯდომარე დიმიტრი ქუმსიშვილმა დეტალურად ისაუბრეს პროგრამის ძირითად კომპონენტებზე და იმ პირობებზე, რომლის მიხედვითაც მთავრობა ხელს უწყობს ახალი საწარმოების შექმნას დაა დგილობრივი წარმოების განვითარებას. პრეზენტაციის შემდეგ მეწარმეებს საშუალება ჰქონდათ დაესვათ კითხვები და დეტალური ინფორმაცია მიეღოთ ეკონომიკისა და სოფლის მეურნეობი სსამინისტროს ხელმძღვანელი პირებისგან.

ღია კარის დღეს ასევე ესწრებოდნენ პროგრამის მონაწილე კომერციული ბანკების, მეწარმეობის განვითარების სააგენტოს, ინოვაციებისა და ტექნოლოგიების განვითარების სააგენტოს წარმომადგენლები.

სააგენტოს აღნიშნული ღონისძიებისთვის მოწყობილი ჰქონდა თავისი კუთხე, სადაც განთავსებული იყო პროექტის სარეკლამო მასალები და შეთავაზებული საწარმოების პრეზენტაციები. სააგენტოს ფრანტის და ქოლ-ცენტრის თანამშრომლები კონსულტაციას უწევდნენ დაინტერესებულ მეწარმეებს და აცნობდნენ სააგენტოს შეთავაზებებს. სტუმრებს შესაძლებლობა ჰქონდათ დეტალურად გაცნობოდნენ პროგრამას, აღნიშნული საწარმოების ჩამონათვალს და დაესვათ შესაბამისი კითხვები მათვის საინტერესო საკითხებზე.